Thursday, June 14, 2007

போர்ஹோவின் முத்தம்



நேற்றிரவு தின்று செரித்த பிரதியொன்று
சில விலங்குகளை உயிர்ப்பித்துப்போனது
கட்டுக்களுடைத்து வெளிவந்த
புலியின் குரூரம் மட்டும் பிரதானமாயிருந்தது
வன்மம் கொண்ட அதன் கண்கள்
தீச்சுவாலையை கக்கியபடி
உச்சிவெயிலில் இலக்கற்று அலைந்தது..


இரை தேடித்திரியும் கானக விலங்கின் வேட்கைமிகுந்து
தன்னுடலில் அதீதமான வீச்சத்தை வெளியேற்றியபடி
நகரபுழுதிகளில் அடர்வு கொண்டு
எதிர்கொண்ட விலங்குகளை மிரண்டொளியச் செய்தது..


எதிர்கொள்ள எதுவுமற்ற வெளியில்
தன் பிரம்மாண்டத்தில் திளைத்த
அதன் வாலினைப் பற்றி இழுத்து
மார்புறத் தழுவி கூரிய பற்கள் தெறிக்க
உதடுகளில் முத்தமிட்டான்
ஜார்ஜ் லூயி போர்ஹோ

ஒரு முத்தத்தில் கரைந்துபோன புலியின் கர்வம்
அவன் உடல் நுழைந்து
புதைந்து கொள்ள இடம்

தே
டி
யலை

ந்

து

பின் தோற்று

அவன் மைப்புட்டியினுள் குதித்து
தற்கொலை செய்துகொண்டது.
Post a Comment

Featured Post

தினசரிகளின் துல்லியம் - கிண்டில் வெளியீடு

தினசரிகளின் துல்லியம்             புத்தகங்கள், திரைப்படங்கள் மற்றும் சில உதிரிக் குறிப்புகள் உள்ளே.. 1.    தினசரிகள...